Luik 15 - Guid Wittins frae Doctèr Luik

“Thïs man ïs weel ïn wi wrangdaers an een gane ïn for a bite tae eat wi thaim.”

⁴“Say yin o yis haed a hunnèr sheep, ïf he loast yin o thaim, wud he no lea tha ninetie nine oot ïn tha muir, an gang eftèr tha yin that wus loast tae he fins ït? ⁵An whan he haes fun ït, he's gye gled an pits ït on hïs shoother, an heids awa hame wi ït. ⁶An whan he gets hame, he caas thegither hïs freens an nighbers an says tae thaim, ‘Cum on an see. Ir yis no hairt gled wi me A hae fun ma loast sheep?’ ⁷A tell yis, jist ïn tha same wye, thair wull be mair joy ïn haiven ower yin wrangdaer that repents o hïs wrangdaein, mair nor ower ninetie nine that thïnk tha dïnnae need tae repent.”

⁸“Or agane, ïf a wumman haed ten siller coins an she loast yin o thaim, wud she no tak a bricht licht, redd up tha hoose, an luk ïn iverie neuk an crannie tae she fins ït? ⁹An whan she's fun ït, she caas thegither hir freens an nighbers an says, ‘Cum on an see. Ir yis no hairt gled wi me A hae fun ma loast coin?’ ¹⁰A tell yis, jist ïn tha same wye, thair's joy amang tha angels o God ower yin wrangdaer that turns frae hïs wrangdaein.”

“Thair wus thïs man wi twa sinns. ¹²Tha young'r yin sayed tae hïs faither, ‘Can A hae noo whut ye wur for leain me ïn yer wull?’ Sae tha faither divïd whut he haed atween tha twa. ¹³A wheen o days later, tha young'r yin gethert up aa hïs belangins an went aff tae a far aff kintrie. He spent aa roon hïm ïn wile leevin. ¹⁴Aboot tha time whan hïs money run oot, thair wus a wile bad famine ower tha hale lan, an he wus starvin wi hung'r. ¹⁵Sae he hired hïssel oot tae a local fairmer that sent hïm oot tae hïs fiels tae feed pïgs. ¹⁶Tha young fella wus that hung'rie got, that he wus near eatin tha husks whut he wus feedin tae tha pïgs. An naebodie gien hïm ocht ava. ¹⁷Whan he cum tae hïs senses he thocht tae hïssel, ‘Luk, ma faither's sarvints haes eneuch tae eat an tae spare, an here A am, deein wi hung'r! ¹⁸A'll git up an gae hame tae ma faither an say, “A hae sïnned agin haiven an yersel. ¹⁹A'm nae lang'r fït tae be caad yer sinn. Wud ye no tak me on as yin o yer hired men?” ’ ²⁰Sae he ris up an went bak hame tae hïs faither.

But whan he wus stïll a lang róad aff, hïs faither saa hïm cumin, an hïs hairt went oot tae hïm an he run an throwed hïs airms roon hïm an kïsst hïm. ²¹Tha sinn sayed tae hïm, ‘A hae sïnned agin haiven an yersel, an A'm nae mair fït tae be caad yer sinn.’ ²²But tha faither sayed tae hïs sarvints, ‘Rin, brïng oot tha guid robe an pit ït on hïm, pit a rïng on hïs fïng'r an shune on hïs feet. ²³Brïng forrit tha calf we wur fattenin up, an kïll ït, for we'r gan tae hae a bïg pairtie. ²⁴For thïs sinn o mine wus deid, an noo he's bak tae life. He wus loast, an noo he's fun.’ Sae tha pairtie begun.

²⁵Noo while aa thïs wus gan on, tha ouler sinn wus oot workin ïn tha fiels, an whan he cum near tae tha hoose he heerd aa tha music an dauncin. ²⁶Sae he caad yin o tha sarvints an axt hïm whut wus gan on. ²⁷Tha sarvint toul hïm, ‘Yer brither haes cum hame, an yer faither haes kïllt tha calf we wur fattenin, acause he's gled hïs sinn ïs hame safe.’ ²⁸Tha ouler brither wus ang'rie an wudnae gae ïntae tha hoose, an hïs faither went oot an tried tae taak hïm roon.

²⁹But he sayed tae hïs faither, ‘Luk, A hae wrocht haird for ye, an no yinst hae A no daen yer biddin aa these yeirs. In aa thïs time ye hae niver gien me even a wee góat tae hae a swaree wi ma freens! ³⁰Yit whan thïs waster o a sinn o yers cums hame, eftèr skailin yer money aa roon hïm on bad weemen an tha like, ye gae an kïll tha best calf aboot tha place for hïm!’ ³¹An tha faither sayed, ‘Ma sinn, ye ir aye wi me, an aa that A hae ïs yours. ³²It's onlie but richt we shud be joyfu an gled, for thïs brither o yers wus deid, an noo he's leevin agane. He wus loast, but noo he's fun.’ ”