Luik 16 - Guid Wittins frae Doctèr Luik

“Yinst thair wus a weel-aff man that haed a bodie lukin eftèr hïs affairs, an summodie toul hïm that thïs owerseer wus squannèrin iveriethin. ²Sae tha weel-aff man confrontit hïm aboot thïs an sayed, ‘Whut's thïs A hear aboot ye? Gie an accoont o whut ye hae daen, for A'll no hae ye aboot tha place onie mair.’ ³Then tha owerseer sayed tae hïssel: ‘Whut'll A dae whan A hae nae steadie work? A'm no fït tae dïg an A wud be affrontit tae beg.

⁴A know whut A'll dae, sae that fowk dïnnae gie me tha coul shoother whaniver A loass ma jab!’ ⁵Yin bi yin he caad ïn tha fowk that wur ïn debt tae hïs boss, an he axt tha furst yin: ‘Hoo much dae ye owe tha maistèr?’ ⁶‘A hunnèr barrels o oyle,’ sayed he. Sae tha foreman toul hïm: ‘Tak yer bïll, sït doon thair quïck an pit doon fïftie!’ ⁷An tae anither he sayed, ‘An whut dae ye owe?’ ’A hunnèr baags o wheat,’ sayed he. Sae tha owerseer sayed tae hïm: ‘Luk here, tak yer bïll an pit doon echtie baags!’ ⁸Tha maistèr o tha crookit owerseer haed tae gie credit tae hïm for tha wye he haed o gettin ïn wi fowk. For tha fowk o thïs warl ir whiles mair lang-heidit ïn thair dailins than tha yins that hae saen tha licht. ⁹An A'm tellin ye, yis shud uise yer warlie siller tae mak freens ïn tha warl; an sae, whan money's nae mair use tae ye, yis wull be gien a walcum ïntae yer iverlastin hame.

¹⁰If yis ir faithfu ïn wee thïngs then yis wull be faithfu ïn bïgger yins. In tha same wye, hïm that's no strecht ïn wee thïngs wull no be strecht ïn bïg thïngs. ¹¹If yis cannae be trustit wi warlie walth, wha wull trust yis wi tha true riches o Haiven? ¹²If ye cannae be trustit wi ither fowk's money, wha wull gie ye money o yer ain tae luk eftèr? ¹³Naebodie can sarve twa maistèrs; for ether he'll hate tha yin an love tha ither, or he'll stïck tae tha yin an thïnk naethin o tha ither. Ye cannae sarve baith God an money.”

“Youse ir tha yins that try tae prove yersels richt ïn tha sicht o fowk, but God knows whut's ïn yer hairts, for tha thïngs that's tarrible weel thocht o bi men wud be a scunnèr tae God.

¹⁶Afore Jhone, fowk leeved bi tha Laa o Moses an tha proafits; but noo tha Kïngdom o God ïs praicht, an iveriebodie's püshin thair wye ïn. ¹⁷But that disnae mean that tha Laa disnae stan, for ït daes, ïn iverie wee point. It's as strang an steadie as haiven an irth thegither.

¹⁸Whaiver gies hïs wife a divorce an gets merriet agane ïs commïttin adultèrie, an whaiver merries hir that's divorced ïs commïttin adultèrie.”

“Yin time thair wus thïs weel-aff man that dresst up ïn fancie claes, an leeved iverie day ïn tha lap o luxurie. ²⁰An then thair wus thïs puir beggar, covert wi sores, caad Lazarus, that lay at hïs gate. ²¹Lazarus wus hopin that tha rich man wud gie hïm tha leains frae hïs table. Whiles, tha doags wud cum an lïck hïs sores. ²²In tha en tha beggar deed an tha angels cairriet hïm awa tae be wi Abraham. Tha rich man deed forbye an wus buriet. ²³An whan he wus sufferin sair ïn hell he cud see Abraham an Lazarus thegither a lang wyes aff. ²⁴An he cryed oot tae thaim an sayed, ‘Faither Abraham, tak peetie on me an sen Lazarus tae dook tha en o hïs fïng'r ïn tha wattèr tae cool ma tung doon, for A'm tormentit wi tha bleeze o thïs fire!’ ²⁵But Abraham sayed, ‘Ma sinn, dae ye mine tha time whan ye wur leevin on irth? You haed iveriethin an Lazarus haed naethin, an noo he's at peace an ye ir tormentit. ²⁶An apairt frae aa that, thair's a bïg deep sheuch atween iz baith, sae that we can hae nae dailins wi yin anither.’ ^27-28Then tha rich man sayed, ‘Faither Abraham, please sen Lazarus tae ma faither's hoose tae warn ma five brithers, sae that the' dïnnae en up here ïn torment lake masel.’ ²⁹But Abraham sayed bak tae hïm, ‘The' hae bin aareadie warnt bi Moses an tha proafits — let thaim tak heed tae that warnin!’ ³⁰An tha rich man sayed, ‘Na, faither Abraham, but ïf summodie frae tha deid appeart tae thaim, the' wud turn awa frae thair sïns an bak tae God.’ ³¹But Abraham sayed, ‘If the' dïnnae heed whut Moses an tha proafits toul thaim, then ït'll no mak onie dïffrence ïf summodie cum bak tae thaim frae tha deid.’ ”