Solace
Author: Darren Gibson
Date: 2012
Source: Ullans: The Magazine for Ulster-Scots, Nummer 12 Wunter 2011/12
Darren Gibson
Tae danner doon loast loanins
Whaur time hings thick as stoor;
An skellied een can aftimes glean
Aa that cam afore.
Tae lay agin a waarm stane waa
That croons a drumlins heid,
Betwixt tha plan o God an man
An free fae unco need.
Tae sklent tha breakers’ fickle pad,
As spate owertaks tha lan,
And ower thair bak tae learn tae tak
Solace frae tireless plan.
Tae turn yinst mair an mak fur hame
Whane’er tha day iz gan —
Oor peace new-made wi him ’at sayed
Be still, an know I am.
Next: The Writings of John Stevenson
Previous: Oor ain strange lan
Contents: Ullans: The Magazine for Ulster-Scots, Nummer 12 Wunter 2011/12