The Real Bad Dale

A juked yin day tae Bellyclare

Tae buy a pair o’ buits

For the yins A noo wis travelling on

In the dunghill had tuk ruits

A striddled richt aff up the toon

Tae the cheapest shap A kent

But whun A saw the prices there

A thocht the owl yins cud be ment

A went inty a shap A knowed

An’ A buyo hove in sicht

An’ speired if he cud fix me up

Fur he cud dae it richt

Sez I, “A doot A’ll hae tae wait

But A need a pair for Kirk

Fur yours are far ooer dear the day

So A’ll hae tae sell a stirk”

“I’ll show you a pair” he saes tae me

“The best pair in the sale

You’ll take a look, I know you’ll buy”

Boys A kent he luked a dale

We fell tae dailin there an then

Fifty pun he wanted there

Sez A tae him “for fifty pun

A cud buy oot Bellyclare”

Sez I “whores the sparbles on the sole?

An’ dang the tae-cap there

What the divil buits are these

The’re no fur Bellyclare”

But A dalt an’ hemmered tae A got

The buits for thurty pun

Boys A wus quare an fashed tae think

O’ the dale that A hud dun

Tae oul Rab McClellans A drapped in

Tae bum aboot the dale

But A wus gunked jist there an then

Whun we taked aboot the sale

He d bocht a pair o’ buits the same

Yin day he went tae Learn

When he shewed me the kine he got

Ye cud speil up ony cairn

For twunty pun wus a he geen

An A wus bravely dun

Sae noo the’re clokin’ on a shelf

For A’ll save ma thurty pun.