Tha Guid Buik
Tha Guid Wittens o Matthew: Chaiptèr 6
- Mak siccar ye dinnae dae yer guid warks afore fowks sae as aaboadie taks tent o it. Gin ye dae thir things afore fowks, ye winnae get nae rewaird frae yer Faither abain.
- Sae, quhaniver ye gie ocht tae a boadie ats puir, dinnae mak a big daeins o it, like tha hippycreets daes in tha Meetin-Hooses an oot on tha fitpads. The jist daes it sae as fowks toves thaim. A warrant ye, the hae aareadie gotten thair dues in fu.
- Quhan ye gie a haun tae a boadie at haes need o it, bot, dae it siccana roád as no even yer biggest billie wud knaa.
- Than it’ll be daen on tha queeit. An yer Faither, at sees quhit ye dae in hidlins, wull gie ye yer rewaird.
- Quhan ye mak a prayer, dinnae be daein it like tha hippycreets! The jist lo’e for tae be stuid up makin prayers in tha Meetin-Hooses an at tha gushets o tha Raas, sae as ilka yin can see thaim. A warrant ye, the hae aa bin peyed aareadie.
- Quhan ye mak a prayer bot, gan til yer chaummer, pu tha duir til ahint ye, and mak a prayer tae yer Faither at cannae be seen. An yer Faither, at sees quhit ye dae in hidlins, wull gie ye yer rewaird.
- Quhan ye mak a prayer, dinnae skail oot a wheen o blethers, tha roád tha pagans daes quhit thinks thair gods gies thaim ear seein as thair prayers is lang.
- Dinnae be like thaim. Yer Faither aareadie kens quhit ye hae need o afore ye ax. Noo, this roád here bis quhit-wye ye maun pray:
Oor Faither, at bees abain
Yer Name be ruist
Yer Kängrick cum
Yer gate be tae be,
On tha yird like abain forbye.
Gie us ilk day oor day’s breid
Forgie us tha wrangs we hae wrocht,
Bein as we forgies aa thaim at wrangs worsels.
Dinnae airt us intil temptin
But save us fae aa ills
For yours bis tha Kängrick
Tha pouer an tha glorie
For iver an aye,
Sae mote hit be.
Next: The First Thirteen Curlers of Belfast
Previous: The Flow
Contents: Ullans: The Magazine for Ulster-Scots, Nummer 5 Simmer1997