A Bricht February Mournin
Author: Mark Thompson
Date: 1999
Source: Ullans: The Magazine for Ulster-Scots, Nummer 7 Wunter 1999
Mark Thompson
We cairryt her
Doon tha brae by tha fiel whaur we kepp tha beess
Dizens o fowk ahin us forbye,
An tears wallin up in ma een.
Past tha enn o Skelly’s road an by Sam Beggs’s loanen
Tha wun wus coul on Bellyfrench
Thon bricht February mournin
A wheen o fiels an a dizen o hens
She spent her days leukin efter
It gien her hauns somethin tae dae
Amang tha tears an tha lauchter
A hae mynn o tha day she wus bakin
Her shoartbreid wus burnt
A filled ma pokits
Wi black shoartbreid
Feart
Ma granny micht greet
We taen her tae Bellyhailbert
An laid her alangside her man
Whaur he wus waitin foarty-echt year
Leukin ower tha Sheugh tae Scotlann
A miss her
Whiles
A quair wee woman she wus
Bot A’ll see her yin day
An ma granda forbye
A’ll tell her o aa tha fuss
She gien us whun she left,
As intil tha grun she wus lowerin
An we happed her ower wi flooers an tears
Yin bricht February
Mournin.
Next: A Wheen mair Rhymes
Previous: The Adullamites at Connor
Contents: Ullans: The Magazine for Ulster-Scots, Nummer 7 Wunter 1999
