Ayont tha Knowes
Author: Philip Robinson
Date: 2004
Source: Ullans: The Magazine for Ulster-Scots, Nummer 9 and 10 Wunter 2004
Philip Robinson
Ayont thonner an thon.
Ahint tha halie knowes.
A plunnèr through a lann o draims,
Tae fin
Whaur hairtsome gledness growes.
Abane aa thochts o threaps,
Amang tha leevin past,
A lan o leevin mem’ries bricht,
Oul times,
New catched, micht langer last.
Atween tha nicht an day.
Awa fae wun an rain.
Afore tha weechil in me growes,
An lees
Me coul an haird as stane.
Awa fae wechtie cares,
Ayont sich warldlie hell,
Tha hamely lan is haird tae fin,
No lake
Tha yin we big oorsel.
Amang tha hairtsome crack.
Aroon tha apen hearth.
‘Ye niver know tha minute, hae’,
Quo he,
A freen lang deid on earth.
A place A knowed sae weel,
A heerd tha hamely tongue.
Sich sichts an soons fae lang ago,
Gars me
Hae mind o whut A fun.
Ayont thonner an thon,
A cudnae thole it lee,
Tha mair thon lan’s ahint tha veil,
A’ll hunt
Fur mair afore A dee.
Next: Twa Brithers
Previous: Alang tha Shore
Contents: Ullans: The Magazine for Ulster-Scots, Nummer 9 and 10 Wunter 2004
