Tha Guid Buik

Matthew 26: Tha Chaummer Abune

Quhan he wus th’ou wi aa thir discoorses, Jesus ses til his disciples “The Passowre’s the day efther themorra, ye ken; an the Son o Mon bees tae be haunit owre for tae be crucified then.”

Jist at this time, the Heid-Priests an Elders o the Fowk forgaithert in the palaice o the Chief Heid-Priest, Caphiaas bi name, an colloqued thegither whitwey tha micht get thair hauns on him bi some jokerie-pokerie an pit him tae deith — “no on the Buird-Day, bot,” the ses, “for fear o risin a stour amang the fowk!”

Jesus wus stappin in Bethanie in Símon the Tipper’s hoose, quhan this wumman cum up til him wi a alyblaster boul o praicious ointment in her haun, quhan he wus atein, an tuimed it owre his heid. The disciples wus ang’rt tae see it “Quhit a waste!” the ses. “It cud a bin soul for a guid soum, an the siller giv til the puir”. Jesus heerd them an ses til them, “Quhit gart yis fyke the wumman thon gate? It’s a guid an a braw thing scho daen on me! Puir fowks yis aye haes amang ye, bot ye winnae hae me for aye. Her empyin this ointment oot on ma bodie is a fore-redd o ma buryin. Atweel, A ledge, oniequhar the Guid Wittins is praiched in the hail warl, the storie o this quhat scho daen wull be gien oot forbye, sae as scho winnae be forgat.”

Syne yin o the twal, the yin tha caa’d Judas Iscariot gaed tae the Heid-Priests an ses til them “Quhat wud ye gie us for pittin him in yer hauns?” The gien him the pey o threttie placks o siller; an fae thon time forrits he wus aye lukin his chaunce for tae dae the dirtie on him.

On the first day o the Buird o the Breid wi nae Barm, the disciples cum an speired at Jesus, “Quhar dae ye want us tae get the Passowre Buird set up for ye?”

“Gang til this mon in the toun an pit it tae him”, The Dominie ses, “Ma day is up an A be tae haul the Passowre wi ma disciples in your hoose.” The disciples daen as the wur bäd, an gat the Passowre Buird set up.

Quhan it wus dalichtgan, he begun tae ate alang wi the Twal. Quhan the wur atein, he ses til them, “A’m tellin yis, yin o youse is for betrayin me.”

The disciples wus gey upset wi that, an begoud tae speir at him, ilkyin o them, “Niver me, sure Dominie”. He answert “Him at dunks his breid in the boul wi me is the yin at is for betrayin me. The Son o Mon maun dee like it ses in the Guid Buik anent him, bot fearsome it wull be for the mon at chaits on the Son o Mon. He wud a bin better aff gin he wus niver boarn!”

Syne Judas, at wus betrayin him, ses “It’s no me ye main, Dominie, surelie?”

“Ye hae it” goes Jesus.

Afore the wur daen wi thair mate, Jesus tuk a bit o breid an, efther he haed made a prayer, he bruk it an giv it til the disciples, sayin, “Tak it an ate it: it is ma bodie.” Syne he tuk a tass an, efther he gien thanks tae God, raxed it til them, sayin “Tak this doon ye, ilkyin o yis, it is ma Bluid, the Bluid o the Covenant, quhilk bees skailit fur the forgiein o the wraing daeins o monie. A’m tellin ye: A winnae hae onie mair drink o the fruit o the vine afore A tak a drink o new wine wi ye in ma Faither’s Kingrick.”