Young Luive

Wull ye merry mae, dear Meggie,

An’ bae mae blushin’ bride?

We’ll trevel this wurl thegither

An A’ll aye bae at yer side.

Och Jock, gie mae mair time tae wunner —

A’m no waantin tae get it a’ wrang.

A’m naw jist shure if you’re tha yin;

A’ve no’ kenned ye that pooerfu’ lang.

Bit, Meggie, wae hae bin coortin’

Fur monies a yeir past an’ gane.

Cum simmer sin an’ wunter sna,

A hae waaked up an’ doon yur lane.

Tha loanin that leads tae yur frunt dure

Whur monies a kiss A hae got,

On tha jook frae yer twa brithers,

Aye gye feared o’ baith gettin’ caught.

We’r naw gittin’ ony younger;

A’m feared we micht miss wor chance.

Jist tell mae that we’r gan tae merry

An’ A’ll soort oot tha waddin’ at yince.

Noo Jock, A’d lake tae sae aye tae ye,

Bit A think wae shud still tak’ wor time.

Wae can still set a date, if ye want tae,

Fur seiven yeir mair doon tha line.

Bae then wae shud ken whit we’r daein’,

An’ forbye that, we’r still in wor prime;

A’ll jist bae near seivinty seiven

An’ ye’ll jist bae turnt seiventy nine.

So tha morra we’ll gae tae tha minnyster

Furtae see aboot gettin’ a date;

Then aff furtae book tha reception

Sae wer freens’ll hae sumthin’ tae ate.

An’ efter wae dae a’ wer business

Thir’s yin thing mair needs tae bae daen —

Wae need tae sit doon an’ ta’k aboot

Whit names we’r fur ca’in tha weans.