Minin Bab

We sa the licht a fiel apairt,

Wur niver lang frae ither;

We progged for fun in ivery nyuck,

An fun the deil thegither.

Ye sa the yin,

Ye sa the tither.

For enless oors alang the lade

An doon the rugh bak-fa,

We ginnled troots an bairded grunts,

Wee sookin-eels an a’,

Amang the stanes.

(Agane the la.)

We sa the tittle hunt the gowk

Low ower the rashy flow,

An fun the greetin peeweeps’ burds

Hud on the grevel knowe,

Whar whutrets jook

An buckies grow.

We tramped laich boags an traiked stie braes,

Wae een as shairp as haks’

For ivery scroag an sit an den,

For hap-marked pads an traks;

An hurkled doon

Bae coved dake-baks.

We sut whiles in the Bluey Knowe

An hel the hizzies bra;

But hel them oany in wer heid

(’Twuz yit afore the Fa).

The thocht wuz het,

The ettlin ra.

We raked the lan frae en tae yin,

We scunged baith day an nicht;

An gien nae thocht (it’s aye the wie)

Tae whut wuz wrang or richt —

Nae thocht ava.

(But noo we micht.)

But thon’s a’ by an lang awa,

Nae guid tae seech or sab:

The yin awar the rinnin’s ower

Waits coorached bae the hab.

Nae rinnin noo.

Nae mair. (Nae Bab.)