Caramoany

A fiel-lenth frae the hoose

(Renyvated, noo, a modren resydence),

The lane’s wore stanes, fait aidges, turn

Awa.

The wie aheid’s a wie mair

Mined nor sa, a scroag

O thoarn an whun an fanglin brier, yit

A rodden yince,

Yince, tae, the hant whar wains run

Scootin tae gether the keekin yella flures,

Bricht as their een; stud quait

Aroon the yellayorlin’s scahldies, streetchin blin

Frae their saft dake-bak nest; gappin at

Ither as trimmlin, graipin hans

Fun the pink heat o the rabbit’s kittlins,

Deep in their dark wull hame; hud, geeglin,

In their dens, frae ither; whar

Yin, a weetchil then, hud deep

Awa frae a worl

He’d lee an niver lee, dreamin o

Whar ye’d be an niver be.

Ower thonner, the ither side the scroag,

Whar yince the rodden gaen,

Unther the hingin brae, booed

Brenches clattin at the roosted tin an crummlin breek,

A hingin rickle, noo,

The ither hoose hurkles, waitin,

Wundas gappin, dorr hingin appen

Tae the wat clie flure an rinnin lime,

Tae the gressy yaird

Whar thon ither wains man yince ’a sported,

Whar anither weetchil micht ’a wanthered

Awa his lane, tae

Dream, his lane, but naw

O far wies o waitin stur an sin,

Naw o this worl —

Thon weetchil ye niver hard aboot, niver

Sa in the een

Bleezin frae lashin sweet at the doag-tyugh breesht,

Skeenklin thon wie unther the pooed-doon scoop, at hir

Mock scowlin,

Wat-bricht ower trimmlin fist an

The appen Book.