Luik 12 - Guid Wittins frae Doctèr Luik

“Luk oot for tha yeast o tha Pharisees, for the' let on tae be guid an the'r far frae ït! ²Thair's naethin covert ower that'll no cum tae licht, or hïd that'll no be knowed. ³Sae, whutiver's taakit aboot ïn tha dairk wull be heerd ïn braid daylicht, an whut ye hae whuspert aboot behin shut dures wull be blared oot frae tha ruiftaps.

⁴Lïsten, freens, dïnnae be feart o thaim that kïll tha bodie, for eftèr that thair's naethin mair the' can dae.

⁵But A'll warn ye noo wha ye shud fear. Fear hïm that haes tha pooer tae kïll, an then tae throw ïntae hell. Ay, A tell ye, fear hïm! ⁶Shair five wee sparras ir soul for a wheen o happence, ir the' no? An God disnae forget onie o thaim. ⁷Even tha verie hairs o yer heid ir aa coontit, sae dïnnae be feart, yis ir warth mair than a hale lock o sparras.

⁸An A say, whaiver's no scarred tae tell fowk that the' belang tae me, tha Sinn o Man wull gie hïm tha honour afore tha angels o God.

⁹But oniebodie that disnae admït tae bein a follaer o mine, wull be denied bi me afore tha angels o God. ¹⁰An whaiver spakes a wurd agin tha Sinn o Man wull be forgien, but whaiver spakes ïll agin tha Halie Spïrit wull no be forgien. ¹¹Whan yis ir brocht afore tha Meetin Hoose offeeshals an heidyins, dïnnae be ower enxious aboot yer answer or whut tae say, ¹²for tha Halie Spïrit wull pit tha wurds ïn yer mooth whan tha time cums.”

“Maistèr, wud ye hae a wurd wi ma brither, an ax hïm tae share wi me whut wus left tae iz?”

“Freen, wha gien me tha richt tae settle a dïffrence atween you an yer brither?”

“Tak heed that yis ir no aye wantin thïngs that ither fowk hae, for a man's life ïs no jist a mettèr o whut he gethers aboot hïm.”

“Yin time, a weel tae dae fairmer haed a guid hairvest. ¹⁷An he swuthered aboot whut he wus gan tae dae, for he haed nae ruim tae store ït aa.

¹⁸Sae he sayed tae hïssel, ‘A ken whut A'll dae, A'll tummle ma barns an big yins that'll houl aa ma grain an guids. ¹⁹An A'll say tae masel, “A hae plentie left bye me tae dae me for monie a yeir, sae A'll jist eat, drink an hae a guid time tae masel.”’

²⁰But God sayed, ‘Ye ir a fool, for ye'll be caad awa thïs verie nicht, an wha'll get aa tha stuff ye hae left behin?’

²¹In tha same wye tha man's a fool that gethers up stuff for hïssel, an haesnae stored up tha richt soart o treysure wi God.”

“A'm tellin ye, yis ir tae tak nae thocht for yer life or yer bodie, whut tae eat or whut tae pit on. ²³Thair's mair tae life nor mait an claes. ²⁴Luk at tha craws, the' nether sow nor reap an hae nae barns tae store oniethin ïn, yit the' get eneuch tae dae thaim, for God feeds thaim. Ir ye no warth mair tae hïm than a wheen o burds?

²⁵Ye cannae add an oor tae yer life bi worryin aboot ït, ²⁶sae, ïf ye cannae dae a wee thïng like that, why worrie yersel aboot oniethin else? ²⁷Noo, tak tha lïlies, ye see hoo the' growe; the' dïnnae wark an the' dïnnae spïn, yit Solomon, for aa hïs fancie claes, cudnae match thaim for beautie. ²⁸An ïf God pits claes on tha gress that's here theday an awa themorra, dae youse dooters no unnèrstan that He'll luk eftèr youse anaa?

²⁹Dïnnae worrie aboot mait or drink. Dïnnae bother yer heids aboot ït. ³⁰Yer Faither abain kens whut ye hae need o, an ït's tha yins that dïnnae know God that rin eftèr sitch thïngs. ³¹But youse ir tae luk tae tha thïngs o tha Kïngdom, an tha ither thïngs wull tak care o thairsels.

³²Dïnnae be scarred, wee flock, for yer faither wants tae gie ye tha Kïngdom. ³³Sell aff whut ye hae an gie tha siller tae tha puir, an thïs wull coont as treysure stored up ïn strang safe moneybaags ïn Haiven, whar ït'll nether be stole nor et wi moths. ³⁴For whut thïngs ye thïnk tha maist o, wull aye be ïn yer thochts an hairt.

^35-36Be aa dresst up an readie wi tha hoose lït up; ect like men waitin on thair maistèr tae cum bak frae tha waddin, sae that whan he knocks yis can apen tha dure tae hïm richt awa. ³⁷Whan tha maistèr cums, blissit ir tha yins he fins watchin an waitin. A tell yis thïs, he'll get hïssel readie, sït thaim doon, an he hïssel wull sarve thaim, an lea tha mait oot afore thaim. ³⁸Tha maistèr wull mebbe cum bak ïn tha wee smaa oors, or at tha scraich o day, but ïf he fins thaim readie an waitin whaniver he cums, the' wull be blisst aa richt! ³⁹Ye can be shair o thïs: ïf ye haed a hoose, an ye knowed tha day an oor a thief wus cumin, ye'd be lukin oot for hïm, wud ye no? ⁴⁰Sae aye be readie, for ye dïnnae ken tha oor whan tha Sinn o Man wull cum.”

“Loard, dïd ye mean these thïngs for iveriebodie, or jist for us?”

“A'm taakin tae onie guid, wise sarvint, whase maistèr ïs able tae lea hïm ïn chairge o tha hoose an tae gie iveriebodie a fair share o mait. ⁴³Whan hïs maistèr cums bak, blissit ïs tha sarvint he fins daein thïs. ⁴⁴A'll tell ye thïs, he'll mak hïm ruler ower aa he haes.

^45-6But ïf tha sarvint says tae hïssel, ‘Tha maistèr's no cum hame yit’, an he eats an gets drunk an bates up aa tha ither sarvints — weel noo, tha maistèr wull cum bak on a day an oor whan he's no readie for hïm, an whan he fins thon sarvint no warthie o hïs trust, tha maistèr wull dae awa wi hïm. He wull trait hïm like an unbeliever. ⁴⁷An that sarvint that knowed richtlie whut tae dae, an dïdnae dae whut he wus toul bi tha maistèr an mak readie, he'll get yin guid whalin. ⁴⁸But tha yin that dïd wrang whaniver he dïdnae unnèrstan whut he shud a daen, he'll get aff aisie, tha mair he disnae desarve ït. God wull ax a lock frae thaim that's bin gien a lock. Tha mair the' hae bin gien tae luk eftèr, tha mair the' wull hae tae answer for.

⁴⁹A'm cum tae kïnnle a fire on irth, an A wush ït wus aareadie lït! ⁵⁰A hae a tarrible baptisin aheid o me, an awfu testin tae ït's aa ower. ⁵¹Dae ye thïnk A cum tae brïng peace on irth? Deed na, ït's deveesion A brïng. ⁵²Frae noo a hoose wi five fowk wull be divïd, wi thrie agin twa an twa agin thrie. ⁵³Tha faither wull be divïd agin tha sinn, an tha sinn agin tha faither; tha mither agin tha dochtèr an tha dochtèr agin tha mither; tha mither-in-laa agin tha dochtèr-in-laa; an tha dochtèr-in-laa agin tha mither-in-laa.”

“Whaniver ye see cloods cumin ïn frae tha wast, ye ken we'r for haein rain, an, richt eneuch, doon ït cums! ⁵⁵An whan tha wun blaas frae tha sooth, ye ken we'r ïn for a scorcher, an sae ït ïs. ⁵⁶Youse hippycrits, yis can read tha sky aa richt, but yis cannae see tha signs aa roon aboot ye, o whut's tae cum.

⁵⁷Why dae yis no see for yersels whut's richt? ⁵⁸If oniebodie pits tha blame on ye an taks ye tae coort, ye shud dae yer best tae settle tha mettèr oot o coort. If ye dïnnae, then ye'll be up afore tha judge an he'll turn ye ower tae tha offysher, an ye'll en up ïn jail. ⁵⁹For ïf that's tha wye ït ens up, ye'll no git oot o thair tae yer last pennie's pyed.”